Jouluevankeliumi meän kielelä

Siihen aikhaan tapahtu se, ette keisari Aykystykseltä tuli
määräys koko mailmale mennä manttaalihuuole. Tämä
manttaalihuuto oli ensimäinen ja se tapahtu silloin ko
Kviriniys oli Syyrian maaherra. Ja silloon kaikin menit,
itte kuki omhaan kaupunkhiin manttaalihuuole.
Niin se meni Juuseffiki ylös Kalileeasta, Naasaretin kaupunkista
Jyytehaan, Taavitin kaupunkhiin, jonka nimi
oon Peetlehemmi, ko se oli Taavitin pahnaa ja sukuperrää,
ja sen tarkotus oli ilmottaa missä hään oon manttaalilla
Marian kans, joka oli sen kihlattu vaimo, vielä raskhaana.
Ja se tapahtu niin ko net olit sielä, ette päivät täytyit ja
synnyttämisen aika oli tullu. Se synnytti esikoisen, pojan
ja kääri ja laitto sen soihmeen, ko niile ei ollu huonetta
hollipaikassa.
Samala paikala oli joitaki paimentajia kiveliössä vyölä
vahtaamassa tokkaansa. Niin nähkääs, Herran enkeli
seiso niitten eessä ja Herran kirkhaus loisti niitten ympärillä
ja net pölästyit villisti. Enkeli sano niile:
– Älkää pölästykkö! Nähkää, mie julistan teile suuren
ilon, joka jällaa koka kansale. Tänäpäivänä oon syntyny
Vapahtaja teile, ja se oon Kristus, Herra, Taavitin kaupunkissa.
Ja tämä oon teile merkiksi:
– Tet löyättä lapsen käärittynnä ja laitettunna soihmeen.
Melkeen varsin sen jälkheen siihen ilmesty enkelin lisäksi
yks taihvaalinen roikka, joka ylisti Jumalaa ja sano:
– Kunnia olkhoon Jumalalle korkeuksissa ja maassa rauha
ja ihmisillä hyvä tahto. Ja vielä tapahtu niin, ette enkelit
jätit net ja menit niitten tyköä taihvaasheen, ja silloon paimentajat
porisit keskenhään:
– Lähemä varsin Peetlehemhiin kathoon sitä hommaa ja
niitä asioita, joita Herra oon ilmottannu meile!
No niilä tuli hoppu sinne ja sielä net löysit Marian ja Juuseffin
ja lapsen, joka makasi soimessa. Ko net olit sen nähneet,
net julistit niile samat sanat jokka heile oli sanottu
tästä lapsesta.
Kaikin, jokka sen kuulit, mainoit sitä mitä paimentajat
olit niile selittänheet. Mutta Maria säilytti kaikki nämät
sanat ja hunteerasi syämessä niitten merkitystä. Ja paimentajat
menit takasi ja killasit ja ylistit Juamalaa kaikesta
siittä mitä net olit kuuhleet ja nähneet, aivan ko niile
oli selitetty.