Daid beivviid bođii gohččun keaisár Augustusis...

Daid beivviid bođii gohččun keaisár Augustusis ahte oppa máilbmi galggai čálihuvvot olmmošlohkui. Dat lei vuosttaš čáliheapmi, ja dat dáhpáhuvai go Kvirinius lei Syria eananhearrá. Buohkat vulge čálihit iežaset, iešguhtege gávpogasas.

Jovsset vulggii dalle Nasaret gávpogis bajás Judeai, Dávveda gávpogii Betlehemii, go son lei Dávveda sogas ja nális, čálihit iežas oktan Márjjáin, gii lei lohpiduvvon sutnje áhkkán ja gii lei máná vuostái. Go soai leigga doppe, de dievai áigi go son galggai riegádahttit, ja son riegádahtii bártnis, vuosttašriegádeaddji, giesai su ja bijai su krubbái, dasgo sudnuide ii lean idjasadji.

Dan guovllus ledje sávzageahččit guođoheamen sávzaealuset ihkku. Fáhkkestaga čuoččui Hearrá eŋgel sin ovddas, ja Hearrá hearvásvuohta báittii sin birra. Sii suorganedje sakka.

Muhto eŋgel celkkii sidjiide: «Allet bala! Mun muitalan didjiide stuora illusága, mii šaddá illun oppa álbmogii: Didjiide lea odne riegádan beasti Dávveda gávpogis; son lea Kristus, Hearrá. Ja dát lea didjiide mearkan: Dii gávdnabehtet máná mii lea gissojuvvon ja veallámin kruppás.» Ja fáhkkestaga lei eŋgela luhtte almmálaš veahka, mii máinnui Ipmila ja lávllui:
«Gudni lehkos Ipmilii allagasas
ja ráfi eatnama alde
olbmuide geaid Ipmil árpmiha!»

Go eŋgelat ledje guođđán sin ja máhccan albmái, de guođoheaddjit dadje guhtet guoibmáseaset: «Vulgot dal Betlehemii geahččat dan mii lea dáhpáhuvvan, ja man Hearrá lea almmuhan midjiide.»

Ja sii doapmaledje dohko ja gávdne Márjjá ja Jovsseha ja unna mánáža mii lei veallámin kruppás. Go sii ledje oaidnán su, de muitaledje buot mii lei celkojuvvon sidjiide dan máná birra. Buohkat geat ledje gullamin, ovddošedje dan maid guođoheaddjit muitaledje.
Muhto Márjá vurkii visot váibmosis ja guorahalai dan. Guođoheaddjit máhcce ruoktot, máinnodettiin ja rámidettiin Ipmila buot daid ovddas maid sii ledje gullan ja oaidnán; buot lei nugo lei celkojuvvon sidjiide.