Viirustarkastukset Aavasaksala

Pojat tulheet ethiin koronaviirusta...
Syynäävä taskulampula kaikki kotelot autosta.. - Olise poka tähelistä hommaa - Ensin komenethiin seisohmaan sinne auton etheen ja sitte se haki kaverin sieltä kopista ja se alko se syyhnäys. Ensin aukasthiin kaikki ovet ja takaluukka auki. Net vähän niinkö tuulutit sitä ensiksi. Konepelti niilä jäi kyllä epähuomiossa nostamatta. Huolelisesti ne muuten kyllä katoit kaikki paikat. Net varhmaan tarkastit että on kaikki niitit verhoilustaki paikahlaan. Se varhmaan se viirus meinaa tukkia sinne verhoilun taka piihloon ko ei se vishiin tykkää aurinkosta. Niinhän se oli ameriikassa se Trumppiki tutkinu. Eikös se meinanu että sitä pitäs saaha valoa sinne kurkkutorhveen että se tappas sen viiruksen. - No ei se ole tainu sieläkhään se valohoito toimia ko sielä niin paljon tullu niitä raatoja...

Kauvon ne pojat sitä autoa tutki. Mulla oli veroilmotus jääny siihen hanttimiehenpuolen penkile niin vishiin net eppäilit että siihen olis tarttunu ko ne sitä siinä kääntelit ja ihmettelit, Net vähän niinko läpivalasit sen mutta niin ne sitte laskit sen takasin. Mie kysyin niiltä että eikös se ole pojat tullihurttien hommaa tuo auton syyhnäys että ei sunkhaan tuo teile kuulu? Se toinen katto minua ja lähti sinne heän pakettiauthoon. Se tonki sielä ja tuli sieltä semmosen paperipinkan kans. Se otti asenon ja sitte se alko lukehmaan niitä parakraahveja. Sieltä tuli poka paljon tekstiä kuuluvala äänelä. Se lausu vähän niinko mie muistan poikasena ko jouluna joku joutu lukehmaan sen jouluevankeliumin joulujuhlissa sielä eessä. Kyllä tuoki olis ollu rohki juhlava kuunela jossaki salissa.. Se toinenhan olis voinu seisoa siinä vieressä ja pittää sitä kynttilää.. Nyt sillä pojala meni kyllä vähän niinku hukhaan se esitys ko eihän sielä ollu kethään muita kuulemassa. Se luki sen ensimäisen sivun ja plaavasi niitä toisiaki mutta niin se lopetti se lausumisen. En mie kyllä hoksanu taputtaakhaan ko mie niin tarkoin koitin kuunela. Jotaki se luki vaaralisesta tartuntatauista ja oli siinä kyllä paljon muutaki. Se toinen käski sitte mennä authoon ja sano että sie saat lähteä ja se toinen kanto sen renkun siittä auton eestä ja viiso että mennä. Kyllä net olit kohtehliaita poikia ei siinä mithään. Toivotit hyvvää illan jatkoa ja heilutit kättä.

Oos kukhaan kuunelu ratiota onko sielä sanottu onko ne löytähneet niitä viiruksia pellolaisilta? Nuothan olit Aavasaksala syynäämässä. - Sitä mie vain että net tarttee poka paljon miehiä jos ne meinaa Torniossaki kaikki syynätä nuin tarkhaan. Sielä oli jo aika paljon nuuskanhakijoita liikheelä. Minusta kyllä tuntus että niile pitäs jonku käyä sanomassa että ei se taia se korona tarttua peltipailakhaan ja eikä se taia kiilua taskulampun valossakhaan. On se niin pieni se elukka.